Demir ýollaryň hyzmatdaşlygy guramasynyň maslahatynyň XXXVIII mejlisine gatnaşyjylar Arkadag şäherine baryp gördüler
Şu gün — Aşgabatda geçýän Demir ýollaryň hyzmatdaşlygy guramasynyň agza döwletleriniň demir ýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisiniň ikinji gününde ähmiýetli foruma gatnaşyjylaryň Arkadag şäherine gezelenji guraldy.
Binýady berk bolup, belent-belent jaýlary özünde jemleýän döwrebap Arkadag şäheriniň gündizleri görkana, gijeleri nuranadyr. Bu şäheriň müň dürli öwüşginli yşyklary özünde jemleýän gijeki owadan görnüşleri bolsa göýä asmandan Zemine, gojaman Köpetdagyň etegine inen ýyldyzlardan düzülen monjuga çalym edýär.
Ýurdumyzda bolýan myhmanlar Arkadag şäheriniň mümkinçiliklerine diýseň ýokary baha berdiler.
